Yig'lasam ko'zimning yoshin oqizgan,

Zilol suvli o'shal jo'shqin soyimsiz.

Har tuni ko'klardan menga boqguvchi,

Yo'lim yoritguvchi oydin oyimsiz.

Qancha termulsam ham to'ymayman evoh,

Sizni sevolmaslik men uchun gunoh,

Bunchayam chiroyli yaratgan Olloh,

Jonim go'zallikka chindan boyimsiz.

Yo'lingiz kutaman zor bo'lib har vaqt,

Qo'lingiz tutaman yorim deb albat,

Mendan kechmasangiz bo'lgani faqat,

Har doim talpingan borar joyimsiz.

Majnunuman sahroni kezguvchi sarson,

Farhodman tog'larni qilguvchi talqon,

Tohirman suvlarda oqqan bearmon,

Zuhro-yu shirinim yo'q Layloyimsiz.

Sevdim aytdim-ku shamol esganda,

Bahor yonimizga takror qaytganda,

Go'zal qiz men uchun rostin aytganda,

Zelishim, Zelixam, Zulayhoyimsiz.